A chi pozzo pregà…

Io ca sante ‘nparaviso nun ne tengo

a chi pozzo pregà pe nu favore,

‘a stessa grazie, ca invece na signora

a cchiù’e nu quarte d’ora sta chiedenno

mo’ a San Gennaro e mo’ a Santu Catiello?

E po’ che dico a chisti  vecchierelle,

si chi è cchiù brave ‘e me già tene ‘a rogna,

pecchè penzammo ognuno ‘e fatte nuoste.

Ce vo’ na faccia tosta ca nun tengo.

Chill’atu juorno n’atu ppoco svengo,

cu tanta gente, nisciune me penzaie

meglio nun passà guaie ‘e chiste juorne.

Tengo n’arraggio ca si t’allaggio a tiro,

te faccio perlomeno n’uocchie niro.

E tu fusso perzona ‘e cunzuguenza ?

Meglio a sta sule ca sta in concorrenza

cu gente ca quanno esce ‘a dinte ‘a casa

cammine accosta accosta, muro muro,

se guarde attuorno pe sta cchiù sicuro

comme si ‘ngiro se facesse ‘a guerra.

Chi tene poco, è overo, ‘o tene astrinto,

Però a forza ‘e stregnere

‘a vita se fa amara e se ritrova

Avaro pure d’’e sentimente

Ca quanno è all’urdeme

Nun l’è rimasto niente.

Me voglio gudè ll’aria ‘e stu paese

p’’o lungomare, p’’o corso, p’’a marina

e si nun trovo a chi me vo’ fa ‘e spese

mett’io mano a sacca ogne matina.

E’ overo ca c’è gente malamente,

però nuie simme tante e lloro  niente.

Basta ca tu nun faie comm’ haie già fatto

Chill’atu juorno quanno m’è dato ‘o sfratto.

La poesia è inserita nella raccolta ‘E primma matina

Pubblicata inserita in quella più ampia

dal titolo “Turnanno arreto “,

edita a Roma nel 2010