Faccio fatica a chiagnere

Faccio fatica a chiagnere

ma tu ce pruove sempe

e io supporto e ddico:

- Nu juorno hadda fernì!

E che te pozzo dì

si io te voglio bbene,

si ‘o core dint’’e ppene

le piace sempe ‘e stà.

Ma io dico:

- Almeno pe nu juorno

lasseme sta nu poco,

ma quanno appicce ‘ ffuoco

pure si è na vrasera

fino a‘o juorno doppo

ce miette sempe ‘o careco

e nun se stuta maie.

Ma quanto adda durà

chesta vraserà

ca pure ‘a sera

te miette e a attizza ?

‘E scorze ‘e mandarine

fanno n’addore doce

na quanno po’ te cuoce

ce allaie sempe cu me.

‘A colpa è ‘a mia

cu tutto ‘o bbene ‘e Ddio

ca io te dongo e daie.

Nu  vaso .. e quannu maie ?

Si ’o sceppo tu ce staie,

ma te vulesse sentere

nu poco cchiù carnale,

cchiù friccecarella

comme a na guaglincella

chella ca redeva

Ch’è? mo’ te n’è scurdata

o è tutta na parata

cu chistu lasse e piglia,

cu chesta cavurara

ca faie certi sserate

e tutte ‘e vvote

ca me vuò mette’ ncroce ?

Ca parle sotto voce

e me vaie cercanno

comm’io te voglio sentere

per perdere ’o tiempo

c’ancora tengo a perdere

sultanto nziem’a te ?

Quanno me vuò felice

e m’accarizze comme a nu criaturo,

quanno te sente femere

e sulo allora rire e capisco

che femmena si tu?

Gioacchino Ruocco

Ostia lido  07/02/2014

Inserita nella raccolta "Suspire 'e miezejuorno"