A quantu tiempo…

‘A quantu tiempo ca ce canuscimmo !

Eremo guagliuncielle

‘ncopp’’e bbanche ‘e scola

quanno ‘e parole nun serveveno a niente,

ma era ‘a simpatia a ce pigliava.

Eremo duie friarielle,

diverse ‘a ll’ate

ca facevano remmore sulamente,

nuie, invece, stevemo appartate

dint’a nu munno

c’apparteve a nuie sulamente.

Si t’aggio perzo, pecchè criscenno

e cagnanno scola,

capette c’’a vita mia era na lotta

e ‘a toia nu sunno ca nun putevo fa.

E te guardavo speruto ‘nmiez’’a via

quanno passave sciantosa ‘nziem’a ll’ate

quanno guardave ma no d’’a parte mia

ca te venevo appriesso ‘nnammurato.

Ma po’ nu juorno

nun saccio comme fuie

qualcuno te facette ‘o nomme mio

e ce ‘ncuntraiemo

comme a chi nun s’è maie scurdate.

E mò ? E mò é n’appiche ‘o juorno.

Che dicene ll’amice ?

E chi ‘e benedice st’appicciche ?

E chi te sta dicenno ‘e me lassà ?

Raccuntamelle prime ca sta storia

avesse cagnà ‘a vita ‘e tutt’’e duie

almeno si te ‘ncontro

saccio ‘e che panne vieste.

Chi fa festa, dimane, nun ‘o saccio,

ma te voglio guardà deritto ‘nfaccia

senza rancore, senza malinconia

e allontanarme tranquillo pe sta via

ca me porte fore città

senza cchiù strille

pe putè campà.

Ostia Lido    13/05/2009     ore 22.00

La poesia è inserita nella raccolta ‘E primma matina

Pubblicta inserita in quella più ampia

dal titolo “Turnanno arreto “,

edita a Roma nel 2010 

presso il Gruppo editoriale L'Espresso