‘O peruozzelo d’’a seggia

‘O peruozzelo d’’a seggia l’aggi’ accunciato già nu sacco ‘e vote, ma c’è sta gente ca nun se corregge, ca nun vo’ stà a sentì ce mette ‘o pede e ‘o fa malepatì, cioè ‘o scassa, ‘o spezze e ‘o falignamme cchiù nun m’arreppezza pe comme hanno ridotto malamente. L’agge levate ‘a miezo già tre vote, ma é sempre in prima fila chesta seggia pe sentì, forse, chello c’‘a  gente dice quanno vene a me truvà. E fuie l’atriere, ca mentre m’’o guardave sentette chillo rumore ca fa ‘o llegno quanno se rompe, oppure sta suffrenno quanno se mette ‘a seggia ‘e ponte ‘ncopp’’e piede, . Chi è stato ‘o saccio: è stato ‘o malamente, chille ca dice e nn’ha capito niente, chille che tene ‘a capa ‘e nu mbriaco, chille c’’o lascia sempe ‘a ‘nnammurata. Ma po’ pecchè i ‘o stò a sentì ancora si ogne vota ca vene io’ me trove ’o peruzzolo  spezzato n’ata vote? Nu juorno,‘e chisto nun arape ‘a porta. E’ overo simme amice, ma che me ‘mporta si ‘a guagliona ‘o lascio ogne tre juorne ? Si fosse a isso me pigliasse scuorno pure d’’o cuntà. Hanno sunato ! Spero ca nun è isso ! Si è isso io po’ che faccio ? Dico ca stongo ascenno. E si me vene appriesso, ma comme me ne esco? Va bbuono, m’’o supporto cammenanno e dint’’ casa nun me fa cchiù danne.                    Gioacchino Ruocco Lido di Ostia,  11.10.2009 La poesia è inserita nella raccolta ‘E primma matina Pubblicta in quella più ampia dal titolo “Turnanno arreto “, edita a Roma nel 2010