Io e te ?

Io e te ? E quannu maie!

Chi nun se rassumiglia

nun se piglia,

punto e basta.

E’ inutile ca frije

tutta sta pasta

pe ne fà zeppole.

E: - Assaggia pure chesta!

E vire quant’è bbona!

E intanto puorte annanze

tutte sta sinfunia

pe te piglià

pure sta vita mia,

ca nun t’avasta

‘o tiempo ca te presto,

ca stongo attuorno a te

matina e sera.

Comme se fanno ‘e zeppole?

Cchiù ove tu ce miette

e cchiù se fanno gonfie.

Falle piccerenelle però

ca ‘e grosse po’ se sgonfiano

si ‘o jianco ‘n è sbattuto

comme se ause ‘e fa.

‘A forma sule pell’uocchie,

‘o riesto pe ji addo và

e quanno ‘a crema è crema

vide ‘e nun t’abbuffà!

Quanno tu vuò fà festa

ogne occasione è bbona.

Basta ca sbatte ll’ove

e ‘un arapì ‘a fenesta

ca dint’’o cavero d’’a casa

allora cresce bbona

‘a pasta e ogne penziero…

ca a te te vene ‘e fà.

Chillo ch'è fatto aiere,

ca staie facenno ogge.

Gioacchino Ruocco

Ostia Lido       16/02/2014

Inserita nella raccolta “Suspire ‘e miezejuorno”