Nmiez’’o mare

‘A cartulina ca t’aggio scritto

a quase nu mese

sta ancora aspettanno c’’a mbuco.

‘O saccio ca si me 'mpiccio

‘o core s’appiccio cchiù forte.

‘O miccio ‘e tutta sta storia

è chillu sguardo

e cchillu suspiro

ca te si fatto scappà.

‘O sapivo ca nun  l’ive fa!

Me canusce

e ’o saie ‘a quann’ire guagliona

ca pe te aggio perzo

‘o suonno e ‘a pazienza

ca so’ ghiuto addò ogne ragione

nun tene chiù ’o tiempo ‘e penzà !

Ma mò che vuo’ ‘a me ?

Ma pecchè quanno m’è visto

m’è guardato cull’uocchie sperute ?

Pe me quanno n’ammore è fenuto

nun c’è niente pe farlo turnà.

E si quanno ce simme ncuntrate

t’aggia stretta ‘a mano cu forza

tu è capito na cosa pe n’ata

pecchè cu forza so’ abituato a campà.

E io cu forza te dico sincero

ca nun è comm’a ll’urdema sera

primm’’e partì.

Si te penzo e ce penzo,

’a vita è cagnata

pecchè ’a vita c’aggio campata

me l’aggio sudata

juorno pe juorno

e nun vulesse mettere scuorno

ne a me ne a te.

Mò so n’ommo tranquillo,

so n’ommo ‘e na sola parola.

E si ‘a nostalgia me piglia

M’’a faccio passà.

‘E canzone so tante.

e ‘a chitarre già ‘e sape.

N’accordo e me scordo

‘e penziere cchiù amare:

tu nun ‘o saie

ma ‘nmiez’’o mare

c’è poco ‘a suffrì

si no se va sotto

e nun tuorne cchiù a galla.

Ostia Lido – 30 aprile 2009 ore 16.30

La poesia è inserita nella raccolta ‘E primma matina

Pubblicta inserita in quella più ampia

dal titolo “Turnanno arreto “,

edita a Roma nel 2010 

presso il Gruppo editoriale L'Espresso