Agricola -Pastor

 Agricola  / Pastor

‘A pecura ch’è perzo

valle trove

primma c’’o sole se ne scenne.

‘O cielo appenna

muntagne ‘e nuvele

e priesto se fa notte.

Fa ca Fauno t'allogge

dint''e pensiere

'e primma 'e stasera 'a truove

fresca e bella

pe sta campagna

ca pasce ggente e  pecurelle

o ‘int’’ a muntagna

ch’è comme a na furesta

cu 'e ceveze, ‘e rapeste,

anepeta,  castagne e pastenaca,

l’evera cetrina c’’a pecura se magna

’a malva, ‘a menta,

aspraggine,  cicoria e purchiacchielle,

carota ianca e mille lampasciune

funge, vruoccule e cardune.

Chello ca tu nun pienze

chello truove.

Si s'è perza ‘int’a muntagna

p’’a famma nun se lagna,

forse p’’o lupo

cu nun ne vo’ castagne

Fauno ca sta currenne nnanze

truvarrà mparanze a pecura e po’ ‘a pace

sott’a luna ca sponta

e va facenne chiara

ogne passe p’’a truvà.

Turnarraie abbascio

cu nu lamiento ‘e be

e n’ato ‘e gioia

si Fauno ‘a grazie te farrà

pe tutt’’e sacrifici che l’è fatto .

A ogne passa

s’’a trova cchiù vicina

ca quase quase

già ne sente addore.

E ‘o core scoppia ‘e gioia

quanno  s’’a vede nnanze.

Gioacchino Ruocco

Ostia Lido                 2015/10/07