Io m’aggia decidere

Io m’aggia decidere

che voglio fa ‘e sta vita!

Nu muorzo sapurito

o comme vene vene

c’’o sanghe dint’’e vene

ca me trovo

ca vò accuntentà a tutte quante,

ca nun vò tuorto

e nun ne fa a nisciuno

ca ll’unico piatto ‘e maccarune

‘o sparte cu mill’ate ?

‘E frate me so’ frate

e m’aspettasse ‘a lloro

n’ombre ‘e bbene,

ma dint’’e vvene

manco na parola

‘e chistu sentimento tenarranno

c’’o bbene chiamma

e cerca

ogne mumento all’ate,

ca quanno ‘e sente

a pasca e a Capuranno

me scenna ‘o core

dint’’e cazettielle.

Ma che farranno

Mentre ’o tiempo passa pure pe lloro ?

Contano cchiù oro o sentimente

perdennese mmiez’a ll’ata ggente

p’arrangià ‘a jurnata ?

Priammo a Ddio

ca si c’è fatte, isso ce adda penzà

a regnere ‘a panza ‘e tutte quante.

Pigliasse ‘e sante

e le mettesse a fà miracule

p’apparà ‘e cunte

a fine d’’a semmana.

Gioacchino Ruocco

Ostia Lido                 2015/10/08

Inserita nella raccolta ”Ogni juorno è nu mese…”