Justo pe fa festa

                                          Sciaquale cu ll’acqua d’’a funtana.
                             Taglia nu spiculillo d’aglio,
                             miettece justo nu paco ‘e sale,

                             na bella fatta ‘e uoglie,

                             e po’ vasenicola quanto vuò

                             ca fa cchiù ddoce ‘a carne ‘e pummarola.

                             
                             'A preferenza jeve ‘e buttiglielle,

                             po’ ‘e sammarzano ca so’ belle toste,

                             ma mò ca nun so’ cchiù ‘e nnoste

                             scigli ‘e cchiù rosse,

                             chelle cchiù mature.

                              A ppane e pummarole so’ crisciuto

                              ‘e piennelo o fresche ‘e miez’a terra.

                              Cunciate primma o mise dint’’o ppane

                              spaccate cu ‘e mmane o nu curtiello.

                              Comm’era ‘a famma,

                              comm’era ‘o cufaniello

                              ca vacante

                              nun ce ‘a faceva a stà mezajurnata.

                              Ce steva chi spereva pure ‘e chesto

                              e so’ magnava

                              justo pe fa festa.

     
       Gioacchino Ruocco

       Ostia Lido                 2015/10/08

       Inserita nella raccolta ”Ogni juorno è nu mese…”