(Restituiteci il futuro) Nu juorno ‘e chisto

Quanno nun tenimmo niente ‘a fa

scennimmancenne  ‘mpiazza, jammo a strillà.

Nu juorno ‘e chisto qualcuno pure sente

ca ce truvammo ormaie malamente

c’’o sinneco ca dice mene vaco

e po’ ritornà e nun se vò schiuvà.

Almeno facesse qualche cosa!

‘E bbuone fino a mò ‘nn ‘ha fatto niente.

Scasseno ‘a villa e chi sa quanno ‘a fanno

chiureno ‘e cantiere  e d’’e bastemiente

nun se ne parle cchiù, c’o viento ca mò tira

‘E terme? Ormaie  ll’acqua scorre comme a niente.

Chi sono ‘a musica s’’a scrive e ‘a canto

e ‘o santo ca tenimmo è vicchiariello.

Sulo ddoje vvote all’anno esce d’’a chiesa

pe na presa ‘e cuscienza, ll’aria nfaccia

e songo muorze amaro pure pe isso

ma ‘o pataterno nun ‘o sta a sentì.

Nu juorno ‘e chisto ‘o mannarrà all’inferno

si cuntinua a cuntarLe ‘e guaie nuoste.

‘O pataterno cu na faccia tosta:

-Pensace tu, Catiè. Ce staie apposta!

Datte da fà ca stongo già occupato:

io tengo mille guaie tutt’’e juorne.

Ogne tanto ‘o prego, pure si spreco

‘o sciato, ma so sicuro ca ‘ncuorpo

ce te mille serpe arravugliate.

Nu juorno ‘e chisto si acchiappo a Cuomo

le dongo na mazzata e ‘o leva ‘a nanze.

Quanno vutate mettite ‘a capa apposta.

Pruposte serie nun ce ne stanno attuorno.

‘A ggente vene, piglia e se ne và.

Tanta guagliune ormaie se ne so’ ghiute

chiejannese ‘a libbretta,  ma chi è rimasto

chesta ‘un ‘o po’ fà.  Tirasse fore ‘o core

e pe na vota tanto ca se facesse masto.

Gioacchino Ruocco

Ostia Lido                       2015/10/04

Inserita nella raccolta “Ce steva na vota”