Sapurito ‘e sale…

                

‘E suspire ca te passeno p’’o core

songo cchiù chjine ‘e lacreme stasera.

Nu chianto amaro te se ferma ncanna

cu nu sennuzzo ca nun te dà respiro.

Qua’ uocchie nire songo ‘e tuoje si overo

erano primma allere e mò so’ triste

c’accuss’ nnire nun l’aggio maje viste

comme si n’ombra t’avesse appaurata.

Te porto io p’’a mano fino a casa.

Aspettemo ca vengo a te piglià

ca ‘nzieme ‘a strata è assaje cchiù sicura.

Te regno ‘e vase pe te fà calmà.

Ma tu, tu triemme comme ‘e ffoglie ‘o viento.

Sarrà c’’o friddo è sciso all’impruvviso

o qualche matto ha fatto ‘a mpruvvisata

pe chesti vvie c’’a ggente s’è scurdato ?

Mannaggio a te ca nun me vuo’ sentì!

Core ‘e stu core, suspiro mio carnale!

‘A ggente ca penzasse ‘e te fa male

sape ca ‘e cunte l’addà ffà cu me

ca songo tanto sapurito ‘e sale

ch’’e mette ‘ncroce sulo cu nu sguardo.

Io faccio ‘o forte, ma pur’io tengo paura

ca si sto sulo cammino muro muro.

Gioacchino Ruocco

Lido         12/01/2015

Inserita nella raccolta “Tipi…”