Silvia

Silvia, te l'arricuorde 

quanno areta ‘a sepa

i’ t’astrignevo forte dint’’e braccia

e me dicive:- Si tu ce pruove  ancora

i’ te ne caccio

facenno comm’’e zite cuntignose ?

L’evera addirosa

me levave ‘o sciato,

ma me metteva ‘ncuollo

'na voglia ‘e te

ca sempe cchiù azzeccosa te facive.

Sentevo ‘o sciato tuio

ca ‘nziemo ‘o mio

curreve ‘o tiempo

‘e nun lassà cchiù perdere

pure sta vota

ca se faceva eterno

tanto me deve ‘a gioia ‘e te vasà.

E cchiù me ne cacciave

e cchiù carnale ire

ca ll’uocchie nire tuie

sembraieno doie stelle.

E che suspire

e che ducezza ire

quanno m’accarezzave

chianu chianu !

Ducezze comme a chelle

nun l’aggio cchiù pruvate

tanto ca sto screvenne

'e 'un m’arricordo

comme fernette po’ chella serata.

I’ nun te scordo maie,

ma tu che faie

ca nun te veco cchiù ?

Dimme addò staie ?

Si no stu suonno pare

n 'eternità

e nun m’addormo cchiù

ca si te perdo ancora int’a nuttata,

comme m’è già succieso,

scunfirato resto e nun capisco maje

si è stata doce chella giuventù

o sulamente perza

comme a tant’ati ccose,

tanta jurnate

addeventate amare,

senza na ragione

o na parola fine,

senza nu cunfino addò fermarme

pe ragiunà nu poco

mentre ‘o ffuoco se stuta ‘e chesta vita.

Gioacchino Ruocco

Ostia Lido 07/03/2013

Inserita nella raccolta "Suspire ‘e miezejuorne"