E vvote ’a guardo e rido

E vvote ’a guardo e rido…

Songo nu poco ‘e juorne

c’allagge sempe ‘e faccia.

Guarda comme esse a caccia

‘e maravizze, quaglie o na zenzella.

Tene na bella faccia

Fresca comme ‘e rrose d’’a matina.

Pare na signurina,

chelle ‘e bbona famiglia,

ma chi s’’a piglia

nun l’è truvato ancora.

Te guarda a smerza,

te guarde dint’’e chije,

te guarda arrete e a nnanze

quase te ammappucea

e te spertose ll’uocchie

p’addubbecarte ll’anema

ca nun credeva avè

d’’o juorno a doppo n’ato.

Quase m’arrizzo ‘o core

sentenneme ‘int’a llosse

ll’onore ca me fa.

No, io nun m’’a faccio addosso

a quanno guagliunciello

m’avevo arreparà.

‘E vvote ’a guardo e rido

comme fa ‘o vvrito

‘e coppe ‘e mure ‘e cinta

quanno ‘o sole splenne,

ma essa nun s’arrenne

me guarda e se ne va

sempe cu ‘o stesso passo

sempe cu ‘a stessa cera.

Forse cu ‘a primmavera

doppo ca ha fatto ‘e cunte

pur’essa cagnarrà

e me darrà nu punto.

E’ na jucata longa

e io jucanno ‘a carta

ca penzo mmano bbona

ma joca si suspira

e si ‘o vestito niro

s’’o cagna e ‘o mette rosa.

Gioacchino Ruocco

Ostia Lido    2015/12/29