Sto a zico a zico…

Sto a zico a zico a te pe nun te perde

cu sta pacienzia mia ch’è ancora verde.

Nun voglio mette vocca a tutto cose,

ma putisse usà chell’acqua ‘e rosa

ca t’aggio rialato ‘o mese austo

pe farte renfriscà   ’e mmane  e ‘a faccia

e tutt’’o riesto ca te fa piacere.

Na rosa c’’o prufummo ca se trova

te fa sentì cchiù allera, a primmavera

quanno ‘e ciardine addoreno ‘e ogni ccosa

ncopp’’o turreno ca se sta scetanno

d’’o suonno ‘e vierno, fossero mill’anne.

Ogne evera ca nasce vo’ dicere qualcosa:

chello c''a chistu munno s’e mbarata,

tutt’’e penziere ca nun so’ avastate

a farle cagnà addore ca tu siente.

Piglia ‘a cicoria pare na pianta ‘e niente,

ma prova a fa ‘a menesta mmaretata

senza ca tu ce ‘a miette assieme a ll’ate.

E’ comme te levasse ‘o latte ‘a pietto

senza fa na zucata a na criatura.

Quanno te ne vaie pe mmiez’’e surche

guardele bbuone. Si vaie truvanno truove

chello ca nun penzavo maje ‘e ce truvà.

Addore ca sturdisceno  ‘e penziere,

piante ca nun c’è mise e ‘o viento t’è

purtato nu juorno ca facette na tempesta

e te cagnaje ‘a festa d’’a jurnata.

Sto a zico a zico pe nun te perde ‘e vista

ca girano c’attuorno cammurriste

ca d'‘e guaglione comme a te fanno uno muorzo

e tutte chille ca songo arriviste.

Sciglie c’’o core ma tiene ll’uocchie apierte.

Ce ne stanno certe ca te fanno festa

cu chiacchiere e chichierche quanno vonno

ma po’ nun fanno niente ca nun ponno.

Ogge c’’o sole è ‘ncielo e primmavera pare

jesce cu ll’ate senza nnammurate.

Guardate attuorno e ride comme a che

ca po’ veneno ‘e juorno c’hanno venì pe te.

Gioacchino Ruocco

Ostia Lido                             2015/12/22