Ce perdo ‘o bbene mio…

Songo rimasto ‘e stucco

pur’ogge ch’è passata.

Pare a bbonaffiaciata

ca ‘e vvote è capitata.

Nu surzo ‘e aria fresca,

‘e fave c’’a ventresca

ancora ‘e latte.

Nu pilo ‘e jatta

ca me fa fa sternuto.

Chi ‘a sape e ‘a sape overo

dice ch’ è na figlia ‘e ‘ndrocchia

ca nun s’’a fa cu chi tene ‘a spocchia.

Invece a me me tremmeno ‘e denocchie

si ‘a guardo dint’’a ll’uocchie.

Si parlo me mpapocchio,

nun dico cchiù nu cacchio.

Ma ch’è nu spauracchio

o na guagliona e basta ?

Tene ‘e capille ‘e rasta

e ‘a faccia ‘e specchio vivo.

Si ‘o sole ‘a  cchiappa ‘e faccia

te fa nu luce luce ca te ceca

e io me so’ cecato

guardannola  sultanto.

‘O musso russo è nu cerasiello

‘e chille ch’int’’o sole spacca e mette

pe fa vedè ‘a forza ch’isso tene

c’’o sanghe te fa scorre dint’’e vvene

comme a nu sciummo ‘e forza quanno chiove

ca sceppa ‘a terra ‘e prete e pure ‘e chiuove.

Si nun ce cride è meglio ca ‘n ‘a pruovo

‘a forza ca ce vo’ pe restà all’erta.

Che dice ‘a facce, oj né, sta fessaria ?

E si dimane avesse cagnà via?

E si ‘n ‘a  veco cchìù po che m’accaccio ?

Ce perdo ‘o bbene mio e pure ‘a faccia?

Gioacchino Ruocco

Ostia Lido                 2015/12/03