Na via ca nun sponta…

Si nun te canuscesse ‘un te guardasse

ma pe sta via ce passe tutt’’e juorne

ca quase quase i’ me piglio scuorne

si dico ca tu signe ‘a vita mia.

Quann’ire peccerella te fermave

guardammene jucà ‘nzieme cu ll’ate.

Si succereva ‘e vvote na petriata

i t’acchiappava ‘a mano e te purtavo

‘o ssicuro dint’a stu purtone

addò ce stanno cchiù lenzole  spase

ca sole ‘cielo si ‘o viento nun le desse

aiuto facennele vulà comme

a palomma ‘a nu penziero a n’ato.

Jucanno  a nascundino  te chiammavo

sicuro ‘e te truvà areto a me.

Facevo a finta ca nun te sentevo

manco si zumpave comme  a arilla.

Tu ire ‘a sora mia cchiù peccerella

e io comme a nu frato te trattavo

cchiù gruosso ‘e te sulo ‘e qualc’anno.

Mo quanno passe e guarde pe cercarme

i faccio finta ‘e vvote e nun vederte.

Ll’anne d’’e pazzie songo passate

e tu t’hè fatta grossa e bella assaie.

Ma ‘o core mio ca pure te vò bbene

quann’esce se ne va pe n’ata via.

Na via ca nu sponta ma me porta

a tuzzulià na porta ca ‘n è ‘a toia.

Ma che ce pozzo fa cu chistu core?

Mentre tu circa ammore.  i’ comme  a sora

te sento int’’e penziero ca me daie

quanno me guarde e nun t’arrienne maie.

Gioacchino Ruocco

Ostia Lido                                 2015/12/13