‘A befana..

Nun pozzo fa regale

c’aggio perzo ‘a pacienzia,

‘a ggioia ‘e nu raggio ‘e sole,

d’’e parole commete

pe pigliarse na tazza ‘e cafè

facenno ddoje chiacchiere

quanno ce ‘ncuntrammo.

Vulesse ‘a te

chello ca nun m’aspetto.

Vulesse essere

nu core ca dà,

ma nun vò niente

ca nun vene dato a ll’ata ggente

manco pe pietà.

Vulesse cammenà

cu ‘a faccia ‘o viento

p’arrefriscarme

chesta capa pazza

ca vò sta sempe 'nchiazza

a dicere qualcosa

c’’a ggente vota e se ne va.

Ma c’aggia fa

si accussi so’ fatto ?

Nun songo comme ‘e gatte

c’’o ppoco nun l’alliccano.

Primmo ero chiatto

e me so’ fatto sicco

pecchè ‘o troppo è troppo

quanno nun c’è bisogno.

Nun pozzo fa regale

pecchè ‘o viento

è arrevato purtanno ‘o maletiempo

e abbasci’ ‘o mare

nun ce sta reparo

p’’e bbarche ca so’ asciute.

N’urdemo saluto

che v’’o regalo a fa ?

Chi sa quant’anne ancora

aggio campà

civannemo  ‘e ragione

bbone sulo pe me ?

Si è male tiempo

qualcosa a ddà cagnà

pe cchesto ‘o munno ngrogna

e ce stà poco ‘a fa.

Gioacchino Ruocco

Ostia Lido                 2016/01/05