Si te penzo ancora

Cerco ‘e avè pacienzia

e sto aspettanno ch’’e ceveze ammaturano

pe te purtà stu frutto prelibato

ca leva ‘a cuollo tanti ‘e chilli guaje

ca nun m’arraggio cchiù proprio pe niente,

pure si ‘o cielo se fa scuro, ‘e notte

e se ne care ‘nterra

chiagnenno  comme a marzo,

cchiù pazzo ‘e me ca tutto nfuso rido.

Ma qua penziere ponno cagnà sta vita

si voglio bbene e so’ vuluto bbene ?

Si ‘e ppene songo l’ombra ‘e chistu bbene,

io cagno via e arrivo ‘o stesso a casa.

Trase e trovo a te ca staie aspettanno

pure si so’ passate dduje minute

tu tiene ‘a freva ‘e n’anno

dint’a ll’uocchie

e cchiù sperute e quanno songo asciuto.

Che r’è ll’ammore ?

E’ comme ‘a freva ‘e quanno

i me ne esco

e tu, tu vuò sape addo vaco.

Sott’’o frisco ‘e n’albero, ‘o ciardino

ca stà a dduie passe proprio ccà vvicino

pe vedè si te penzo ancora

a doppo nu minuto

o na mezora.

Gioacchino Ruocco

Ostia Lido                       

29/01/2016

Alberi di gelso