Quanta fatiche....

Quanta fatiche ca me so custate,

quanta sputate mmano

pe tené ‘a zappa stretta

tiranno ‘e surche

p’arraquà ‘e piante.

Nun era ‘o chianto d’’e mbolle

ma ‘o dulore d’’a terra

ca ogne ghiuorno

vutavemo

p’’a regnere ‘e semmente.

Terreno c’atrignuto int’a na mano

restava comme ‘e palla pe jucà

e p’agghiustà ‘o tiro

e dint’’e surche addeventate nire

nun se vedeva  n’uovo ‘e n’auciello.

‘E vvote ‘o tiempo scumbinava ‘o juoco

chiuvenno all’impruvviso

e ‘a cammisa ncuollo

se faceva comme a n ascella ‘e palomma

squagliata dint’a na goccia d’acqua.

‘O viento se ne purtava ‘e sische,

sulo sottoviento  arrevavano ‘e mmasciate

ca chi turva primmo preparava

‘a tavula justo pe na supponta

E jì a nnanze a fina d’’a jurnata.

Gioacchino Ruocco

Ostia Lido                  2016/01/12