Allora c’aggia fa ?

Quanno piglie e te ne vaie

pe nun me stà a sentì

invece 'e chiagnere

me vene quase a ridere

pecchè me lasse sulo

senza cumpagnia.

Me vene a ridere pecchè,

'o ssaie meglio 'e me

ca doppo nu minuto m'é passata.

Me faccio sulo sulo

'a via d''a casa

speranno ca te trase 

dint''o core ogne penziero

ca t'aggio raccuntato.

'O mio é nu mestiero

ca nun s'arrenne maie

pure si 'mmiez''e guaie

ce stongo malamente.

Ce stà chi parla e scrive

e chi sta sempe 'ngiro

e  se fa niro niro

p'arraggia c'ammatura

ogne gghiuorno

ca nisciuno s''o file.

Allora c'hamma fà ?

'N avessemo parlà ?

Sulo 'e deritte parlano ?

'E fesse c'hanno fà ?

Hanno sta zitto e mute

e sempe a fatecà ?

Pigliasse n'ambo almeno

pe nu bicchiero d'acqua !

Ma quanto songo scemo

c''a lira nun me manca.

E' ca me sento stanco

'e tutte sti rragione.

C''a fanno sempe franca

chille ca nun so' bbruone,

e chi vence 'o melione

senza sapè che farne

mentre 'o vestito mio

s''o so' mangiato 'e tarme.

Gioacchino Ruocco

Ostia lido     2016/01/12