A brenna….

Si carreche ‘o fucile a brenna

nun credere c’’a gente nun ‘o ‘ntenne.

’A primma vota te po’ ghj’ pure bona,

m’a vota appriesso chi sape ‘o fatto

nun sule ‘o ‘ntenne,

ma nun accetta ‘o sfratto.

Pure ‘o cchiù fesso capisce ‘e mode tuie.

Fesso na vota si, ma maie doje vote.

Cuntanne fessarie

falle cu ‘e criature.

Na vota scanagliato

può sta sicuro

c’’a siconda vota

nun truove cchiù nisciuno

ca te sta a sentì.

Dint’a nu votta vota

nun allungà ‘e mane

ca si nun te va bona

so' schiaffe e mulignane.

Te fanno niro niro

comme a cravone

ca sule si l’appicce

te po’ dà calore.

Si carreche ‘o fucile

‘n ‘o carrecà a brenna

ca si qualcuno ‘o ntenne

so fatte tuie buone

ca manco sant’Antuono

‘a grazia te po’ fà,

ca quanno ce miette ‘e mmane

‘o santo nun ce stà.

Gioacchino Ruocco

Ostia Lido              13/11/016

Raccolta: Locuzioni e corruzioni.