E io t’allargo ‘e braccia pe sta ‘mpace...

‘O male tiempo ca  se sta preparanno

chi sà che guaie porta quann’arriva.

Si chiove pure na goccia sola

‘a fine ‘o munno sarrà na cosa fatta

sceppanno ‘e prete a terra  ‘a coppe ‘e Fratte

Chiudere ‘o core dint’a  na buatta

a che te po’ servì si tiene ‘o sfratto

e arrange comme può addò nu gancio

te dà mano sott’a nu purtone

‘o dint’a na cantina o ncopp’o muolo

sott’a na barca c’aspetta ‘o masto d’ascia.

Ormaie so’ tiempo ‘nfame, maie pruvate.

Na cose ereno ‘e bombe ‘e na nuttata

e n’ata cose so jurnate  triste.

Nun Cagnà ‘o juoco comme si fosse Cristo

'o capo 'e nu partito comme a n’ato

e no ‘o figlio ‘e Ddio ca ce ha criato.

Chiammelo comme vuò ‘o Dio tuio.

Si a me nun me vo’ bbene

è sulo ‘o tuoio e basta.

Duie file ‘e pasta, facimmo uno pe uno,

ma po’  nun fà tremmà ‘o munno sano

c’’o mio tene pacienzia, core pe tutte.

Guardammece ‘int’a  ll’uocchie

senza fa tanta chiacchiere

ca si venesse io a casa toia

avesse voglia ‘e me secca ‘a lengua

cu ll’aria caura  ca va brucianno ‘o cielo

e ‘un se capisce qual è stu paraviso.

Tengo pacienzia e nu bicchiero d’acqua

‘n ‘o nejio maie a niscuno.

Pe piezze ‘e pane tenimme ‘ e tarallucce

cu ‘e fenucchielle  o ll’ate ciure ‘e terra

prufumate ca fanno scurdà ‘a guerra

e io t’allargo ‘e braccia pe sta ‘mpace.

Gioacchino Ruocco

Ostia Lido    28.11.016