Pe me maggio si tu (A Saltovar)

Pe me maggio si tu

A Saltovar

Ancora ‘o core frisco

me sento quanno torne

a leggere ‘e vierze

d’’a toia  Janestra d’oro,

‘o libro ca truvaie

dint’’o treno

ca mu purtava a scola

o a casa forse.

“Maggio na fila d’albere

‘int’a nu bagno d’oro.”

‘O viento ‘ncopp’a lasteco

pazzea c’’a biancheria.

E tu pazzianno vaie

cu ’a fantasia mia

ca va screvenno vierze

a tunnellate,

mentre  Rusina scenne

Cu l’erva sotto ‘o vraccio

e a me me faie venì

‘a voglia ‘e ‘a piglià ‘mbraccio.

E miezo stupetuto

liggenno vaco a ‘nnanzo

d’’o sciore arancia scorreno

‘e lacreme ‘e rusata.

Si ‘a vocca tremma e sparpeta

io nun ne pozzo cchiù.

‘A giuventù è passata.

Pe me maggio si tu.

Gioacchino Ruocco

Ostia Lido  26.11.016

A Saltovar   

(Silvio Salvatore Gargiulo, poeta sorrentino)