Abbelì o abbelirse ?

Abbelì o abbelirse ?

Essere pe ll’ate

comme a nu cane muzzecato

o jenne  muzzecà come a nu cane arraggiato

e farle jì ‘o spitale pe s’arreparà ?

‘A vita è sempe ‘nfame e ccorta

o furtunta pe chi guadagna assaje

e nun canosce ‘e gaueje e ‘a sufferenza

‘e chi o s’accuntenta o resta senza

p’ essere scurdate ‘a tutte quante

pure ‘a festa ‘e ogni ssante,

ca sante nun simme

pure si parimmo

comme a cristo ‘ncroce.

Quanno aizammo a voce

ce guardeno pe dì

ma chi so’ chiste ?

Pure ‘e pariente

Se so’ scurdate ‘e te

Pecchè tu nun si niente,

nu sciuscio ‘e viento

ca se perde ‘int’all’aria

e nun prufume ‘e niente

 o forse ‘e na miseria, nu lamiento

comme a na disturbata

ca ‘un t’appartena.

Chi songo io, chi ero primmo ‘e nascere ?

Rummane nu mistero pure pe me

c’ancora crero a qualcosa ‘e santo.

Me guardo attuorno

e ‘o chianto ca me piglia

me fa scurdà ch’’e vvote songo figlio

e no ‘o pate ‘e tutte ‘e suffrenze.

Ma chi nun sente chesta appartenenza

o nun è ommo o è ddio

ca resta indifferente,

 ca s’è scurdato

‘e nuie ncopp’a sta terra.

O è tutto nu triato

senza sapè che ce facimmo ccà,

quanno murimmo a ddo nuie jammo sta !

Te guardo ‘nfaccia e pare ca si figlio

d’’a stessa mamma mia

ma si me giro si comme a nu cuniglio

ca roseca ogne ccosa, senza pose,

basta ca campa e arriva ‘a fine d’’a jurnata.

Ma simmo ammore ‘e Ddio o nu peccato

ca scunfirato ce lascia sule sule

nnant’a nu piatto ‘e pasta asciutto

ca cundimento nun ce ne sta cchiù ?

Gioacchino Ruocco

29.05.016                     ostia Lido