‘E vvote tuorne…

Comme a na palomma ‘e vvote tuorne

comme io fosse nu sciore

 a te piglià qualche penziero

ca ripenzanno a te me vene sempe.

Te veco ‘ncopp’’e sciure d’’o balcone

a cercà chillo ca te piace ‘a sempe

e quanno nun ‘o truove

nun te faie capace

ca ‘e vvote seccano

o nun è stagione.

‘O saccio songo io ca nun ragione

ca tu nun po’ sbaglià stagione

comme facc’io ‘e vvote

ca me veste lieggiero

e fore è frisco

e nu minuto doppo starnutisco.

‘O saccio ca tu saie ‘o fatto tuio

ma a fa ll’ammore simme sempe duie

e qualche vote pur’io m’accaccio

na parola bbona.

Ma mò che cirche ca me staie attuorno ?

Me perdo appriesso a te mentre tu vuole,

ormaie stu sciore mio s’è fatto viene

e sta scarmanno ogne ghiuorno ‘e cchiù.

Jenne ‘o mercato si venneno doie scelle

m’accatto e provo a te venì appriesso.

Chi ‘o sa che po’ succedere

Si d’’o balcone ‘o piglio ‘o volo ?

O so’ felice o è n’infelicità.

Diversamente nun saccio che po’ dà.

Na via ‘e miezo ? Pe dint’a chisti viche ?

Nun tengo cchiù n’amico,

nun tengo cchiù nu core pe parlà.

Voglio parlà cu ttico

e jì cercanno nu cielo amico

ca quanno ce fermammo

ce stanno sciure ‘e ogne stagione

e a llà nun ce ne jammo

a perde tiempo attuorno.

Gioacchino Ruocco

Ostia Lido                    30.05.016

Inserita nella raccolta “traduzioni dal greco”