Si fosse pe stu cielo

Tramonto a Basilicanova

Si fosse pe stu cielo

‘o munno nun avesse maije fernì.

Io songo sempe ‘o stesso

tale è qualle ‘a quanno me canusce.

Si te porto p’’a mane

non songo meglio ‘e te c’ammusce

dicenne ca so strano

‘a qualche ghiuorno  arreto ma cuncreto.

Sento ca tu me manco

e ca me sento stanco ‘e one ccosa.

Piagliammo mò sta rosa

s’è seccata ‘a nu mumento a n’ato.

Pure si nun m’’o dice

nun te vedo felice tutt’’e vvote

ca te guardo. Capisco

ca st’ammore pe quanto l’arrefrisco

è viecchio comme a nuie

ca le girammo attuorno e ce pigliammo

scuorno quanno ‘un ce dicemmo

‘e ccose comme stanno, chello ca vuò,

chello ca vogl'io. Nun è

nu mbruoglio, ma primmo ca me lasse

te voglio purtà a spasso

comme a quann’eremo guagliune

comme a quanno

t’arrubbavo nu vaso a ogni passo.

Ogge cu stu sconquasso

‘o tiempo cagna ‘a vita ogne vutata

‘e capa e io nu poco a vota

me sento stanco ‘e fa nu passo sulo.

Si nun te fa piacere

fammo ‘o sapè c’almeno cagno strata.

Gioacchino Ruocco

Ostia Lido                 02.05.016