Sapevo ch’iro tu,
e ire ‘o primmo ca cercavo sempe.
Si me sbagliavo me mettevo a chiagnere
E chi ‘o sapeva pecchè stevo chiagnenno ?
Dint’’o vico ce ne steve ggente.
Ce steva mammatoia e pura ‘a mia,
ce steva a nonna, ce steveno ddoje zie,
don Vicenzino ca diceva sempe:
-
Nun me venì a cercà cu ‘e fierre mmano.
Sentevo addore toia ch’era diversa
A ll’ate ca jucavano cu nuie.
‘O figlio ‘e Gennerino ‘o carrettiere
addurava ‘e pane ‘e mulignane
chille ‘è Miccirialle
sembravano lanterne affummecate
e Vicenzino ‘o figlio d’’o signore
d’’o fummo d’’e battumme c’appicciava
Pe fà ‘o ffuoco ‘int’a cucina ‘a mamma.
Restaveno fore ‘o figlio ‘e Gesummina
e Bernardino ‘o figlio d’’a Chichierchia.
E guaglincelle io e Francischina
ca gia penzava a Peppe,
‘o figlio e ‘On Carminuccio ‘o mastedasce.
L’addore tuio era ‘e culata fresca
ca mammeta stenneva dint’ ‘o sole
a ddò cuceva overo,
a ddò ‘o viento era cchiù sincero
purtanno d’’a muntagna
aria cchiù fresca
ca sbatteva ‘e lenzole fino a sera.
M’avvicinavo a te e sentevo
‘o core mpietto ca sbatteva a mille.
T’accarezzava ‘a faccia e po’ ‘e capille
e ire chillo
ca io vulevo sempe nduvinà,
pe t’abbraccia redenno
c’ancora ogge
‘o vvì ca nun m’arrenno.
Gioacchino Ruocco
Ostia Lido 28/05/016
Nessun commento:
Posta un commento