‘A malincunia è nu rebbeto...

‘A malincunia è nu rebbeto

ca nun se pava maie.

E’ comme a nu guaio

ca senza na ragione

te piglia pure quanno

è gia stagione  e ‘o mare

t’aspetta pe na sfera ‘e sole

pe  t’’a levà  ‘a cuolllo

comme a nu surore

‘e raffreddore.

Mammema nun l’aggia vista maie

cu l’uocchie affessionate

e patemo cantava

pe fa cantà a ll’ate

pe cagnà ‘a faccia

d’’e ghiurnate

stanco d’’e nuttate d’’a fatica.

M’’a trovo dint’a ll’uocchie

all’impruvviso

comme a nombra ‘e friddo

c’arriva dint’’o vico

a na cert’ora

cu ‘e panne stise ‘o sparpeto,

e quase vene a chiovere.

E’ ll’ombra d’’a muntagna

c’’a chest’ora

s’addorma  p’’a cechia

ca tene all’uocchie

c’ogne matina se sose alla buonora,

dice na signora ca passano

sente core stu chiagnere.

Ma a me comme succede ?

Forse pecchè te voglio e nun te trove ?

Ca staje facenno ll’ove a n’ata parte ?

Ca vajie a casa ‘e mammeta ogne ghiuorno ?

Nun ce capisco niente.

Comme  stu male ‘e diente

ca me piglia all’impruvviso

senza avè mangiato ‘o riesto ‘e niente.

Gioacchino Ruocco

Ostia Lido              18.06.016