Napule nun è nu paraviso…

Napule nun è nu paraviso,

è ‘o munno sano sano

addò se more acciso

‘o campe pe campà

c’o core sempe chino

e cu ‘e mane vacante

addò so’ tutte sante

o figlie ‘e bbona mamma.

Chello ca ce manca ogne ghiuorno

è na pacienzia grossa quanto ‘o munno

ca già pacienzia ne tenimmo assaie

pe nun ghj’ a funno

tutte quante assieme,

pe fà felice a chi nun tene  niente

e rusecanno ha perzo pure ‘e diente,

a chi è cchiù disperato

ca guarde ‘nafaccia a chi le vene a tiro

cchiù niro ‘e isso che s’è fatto ‘e pece.

‘O munno avesse girà a smerzo

pe ritruvà ‘o tiempo c’hamma perzo

quanno se so’ mbrugliate ‘e lengue

e chi se l’è mbarate

jeva facenno fesso   a tutte all’ate.

Cagnanno idea pe chille ch’è venuto

tutto è ferneto a tarallucce e vino.

Si fosse nu paese malamente

se ne futtesse ‘e tutto,

nun se vestesso a lutto ogne mumento

specie si ‘a guerra arriva dint’’e ccase.

Turnanno a mò, passannece na mano p’’a cusciezia,

chi è senza penitenzia aiza a mano.

Nu passo a ‘nnaze chi è muorte ‘e famme

pure si se fa nu culo tanto.

Chi è senza nu mestiere nun è napulitano.

Si aiza ‘a mano po’ resta pur’isso

basta ca se mette ‘a faticà,

ca p’arrevà nu juorno ‘mparaviso

ce ne vò ancora,

pe fà capì a chi canta

ch’e vvote na buscia va pure bbona

m’avimmo fa nu vuto a san Gennaro

e nun cuntarce chiaccere e frummelle

si no sta vita ca rimane belle

ce resta ‘nganno a paricchie ‘e nuie.

Gioacchino Ruocco

Ostia Lido 23.06.016