Pareno morte ‘e ffoglie

Pareno morte ‘e ffoglie

Pareno morte ‘e ffoglie

c’’o viento lascia stà

e attuorno ce sta n’aria

ca nun fa carità

e nu penziero bbuono

c’appiccia ‘o fuoco

sott’a nu caccaviello.

Chi sa a che ora

turnarrà a casa

si ‘o cielo po’ mantene

ch’è scuro scuro ‘e nuvole.

‘A paglia, ‘o ffieno

stanno ancora fore

a piglià ‘o sole

pe se fa cchiù sicche.

Pasta e fasule aiere,

stasera na ‘nzalata ‘e pummarole

c’’o janco ‘e na scarola

o nu vascuotto ‘e grano

cu ‘e pacche secche

c’’o cerasiello forte.

Fino a ca nun tuorno

t’aspetto ‘nziem’’o cane.

Mentre ‘a tiana volle

te può lavà ‘e mmane.

Sara chello che vò

d’’o tiempo e ‘o cielo,

ne tengo ancora sciato

fino a stasera.

Ce credo o nun ce credo

è chesta  ‘a vita.

Cagneno ‘e nomme

cagnarrà ‘a ferita

ma si si n’ommo

sempe è a turna ccà

Gioacchino Ruocco

19/06/016