Io songo nuovo ‘e stu paese tuio.

‘E ccose bbone s’’e godeno ll’ate

ca d’’a famiglia so sule cazziate.

Te stongo appriesso ‘a cchiù ‘e qualche mese,

sule a guardate é male tiempo ‘e mare,

na sera ‘e friddo pecchè t’aggio ncucciato

mentre turnave a casa sola sola.

Cuntinue a me gurdà, ma nun rispunne

quanno te faccio segno ‘e m’aspettà.

Po’ cagne via e vaie p’’o vico appriesso.

‘E vvote trase dint’’a nu purtone

e aspietto ca pur’io songo passato.

C’aggia penza ca nun te vaco a ggenio ?

Ca forse tenarraie qualcun’ato?

Si tu te firme n’attimo te spiego

‘a te che voglio, pecchè te vengo

appriesso. LL’ate so’ cchiù sfacciate.

Se fermeno, risponneno comme si

niente fosse e po’ cu na risata

me lasciano mpalato e se ne vanno

p''e fatte lloro e si ‘e ‘ncontro ancora

stavota  songo lloro a me chiammà.

Cuiete, sistemate pe me cuntà

nu fatto o pe me fà n’invito

e jì a na festa lloro ‘o juorno doppo..

Io songo nuovo ‘e stu paese tuio.

me voglio presentà a chi me piace

c’ ‘a quanno t’aggio vista e po’ rivista

si una ‘e chella ca me piace ‘e cchiù.

Cu tte io me fermasse vuluntiere

quanno te ‘ncontro comme è succieso aiere.

Tenive na paura dint’a ll’uocchie,

ma quanno me vediste risciataste.

'E vvote basta n’ombra, na parola,

nu sguardo stuorto e nun s’è cchiù sicure

pe chesto quanno io sto sulo a casa

me sbarra a porta e chiudo ’a serratura,

Si po’ tu dice ca stu raggiunamento

nun l’haie capito e nun te ‘mporta niente,

lasciamma perde’. Quanno ce ncuntrammo

cu ll’uocchie dint’ alluocchie io te saluto

e tu rispunne si me vò risponne

si no me godo ‘o frisco ‘e chesti fronne.

Gioacchino Ruocco

Ostia Lido                     25.06.016