Si puorte ancora ‘a spia ‘o Pataterno…

Si puorte ancora ‘a spia ‘o Pataterno

te fà piglià ‘nu terno comme premio.

Che te ne ‘mporta a te

s’io me ranno l’anema

cercanno chelli vie

chiene ‘e cunfusione,

addò ce sta qualche anema

ca canta na canzone  d’’e parte noste

c’ancora fa sentì anema e core ?

Si fosse overo chello c’hanno scritto

pur’ Isso, Ddio nun se ne po’ sta zitto

lasciannece muri senza na gioia

ca nun è sola una, ma ddoje vote.

Lassamme ‘o fa ca Isso sape comme,

ma si le puorte ancor n’ata spia

me dice c’a ddà fa stu poverommo ?

Te lasso sola sola e vaco addò

se senteno canzone tutt’o juorno

e campano sultanto pane e pane

ch‘e cepolle ….hanno cagnato ‘o ditto

e quanno a mmiezo juorno ll’acqua volle

ce votto dinto ‘e lengue ‘e Menelicco

e po’ voglio vedè si chiagne ancora.

Io stongo abbascio già a nu quarto d’ora

aspettanno ca scinne, ma faie tarde

cu ‘a scusa  ca tu ‘mpienne

‘e piennele pe me.

Si puorte ancora ‘a spia ‘o Pataterno

‘e chello c’aggio fatto o sto facenno

peggio pe Isso ca te sta a sentì

pecch’ te giuro ca si piglio ‘o terno

lasso fa a Ddio chello ca vo Isso

basta ca me lascia ‘o sentimento.

‘O riesto ‘o ddongo a chi nun tene niente

a chi sta peggio ‘e me c’ormaie sta sulo

e ‘un tene manco a chi porta na spia.

Gioacchino Ruocco

Ostia Lido                             23.06.016