‘A voglia ‘e mandarine

Mandarini di Sorrento

Me so’ scetato

cu ‘a voglia ‘e mandarine,

manco si fosse ‘ncinta,

o ll’urdemo gulio

ca m’è venuto.

Cu ‘ primme fridde

arriveno e starnute

e se ne va ‘a salute

cu nu principio ‘e freve.

‘A neve quanno arriva,

stammo ‘o mare

e stammatina invece

ero nu manto janco

‘a villa ‘e vie,

a cupola d’’a chiesa

ca c’’o primmo rintocco

se l’è levata ‘a cuollo.

E io me so’ miso n’ata scolla!

‘E chisti tiempe

ce vonno ‘e vitamine

dice ‘o miedeco

o na spremmuta ‘e arance

e mandarine

e po’ na grattatella dint’’e rine

ca songo stanco

‘e stà dint’a stu lietto.

E fosse sulo chisto

‘o refettiello mio

quanno t’aspetto a taglio

e tu nun viene.

Mo tengo ‘a freve

e te sparagne ‘o ddoce,

Ma quanno faie 'a voce

‘e culumbrina

che vaie truvanno ‘a me

si tengo ‘a tosse

e justo justo me reggo

ncopp’e cosse

quanno aggio jì a fà ‘e bisogne, mie

‘nzogna ‘nzogna ?

Gioacchin Ruocco

07.06.016