Sarrà pure na bella jurnata

Sarrà pure na bella jurnata,

ma senza viento na cumeta è morta

‘E penziere a uno a uno

Saglieno a fatica dint’’o cielo

Addò l’azzurro se fa janco e more.

Attuorno nun ce sta nisciuno.

Satore, zitto e muto,

se n’è turnato a casa

a priparà pastore  pe dimane

ca si nun chiove ncopp’a via nova

sarrà ‘a solita ammuina ‘e ll’ate juorne.

Ogne tiro sarà na gioia perza

Si è troppo curto o luongo assaie,

ma strille fino ‘o cielo

si arriva ’o punto.

Io aspetto a patemo ancora prigiuniero

e songo furastiero a ogne juoco.

Chi sa si m’arricorde ‘a faccia soia,

si s’arricorde ‘e me ch’ero criaturo ?

Na lacerta, sola comme a me, se gode ‘o sole.

E’ nun sparagane tiempo

p’’o dulore d’’a cora ch’è tagliata.

Po’ succedere dimane n’ata vota

Ma dint’’o muro ce stà n’arricietto

C’aspetta e sta sicura.

Ognuno tene nu penziero nfame,

ognuno porta  l’acqua addò vo isso

ognuno, ma succere spisso,

nun s’addone attuorno che succere.

si ‘o munno è sempe overo.

Sulo dimane sarrà n’ata jurnata

quanno chesta è passata

E ‘un è arrevata ‘o viento

P’annarià cumete

Penziere ca a me m’hanno stancate.

Gioacchino Ruocco

Ostia Lido                          19.06.016