ILVA di Taranto

ILVA di Taranto

ILVA di Taranto

Me pare nu paese sgarrupato

sta fabbrica ch’è cchiù malata

‘e uno ca nun trova pace,

ca tene 'ncuollo na brutta malatia.

‘A gente mmiez’a via disoccupata,

chillo ca lavora miezo miezo

e chillo ca ce lascia 'a vita soia

pecchè chill’ata dorme sempe allerta.

Nisciuno guarde, nisciuno vo fa niente.

Ormaie ‘a miseria se ne va co viento

semmenanno ll’ardica, chiantimme

ca bisogna brucià ‘o terreno

si no ricresce n’ati ciente vote.

Si nun se fa na bona pulizia

accumminciammo cu l’avemmaria

tutte ‘e juorne. Nu requiem eterno

pe ce scurdarce  d'‘e muorte,

l’anema mia ca nun canosce pace.

Cu tanta legge e ‘a ggente ca nun legge

nun saie a chi dà tuorto e a chi ragione.

Tanto se more ‘o stesso dice qualcuno.

Ce stanno tanta fesse sempe a mmiezo

c’’a miezo juorno nun se mangia cchiù.

Se chiagne p’’a miseria,

se chiagne p’ogne muorto,

ma a chi t’è muorte tu nun chiagne maie.

Staie sempe a fà ‘e cunte. Ma a che pienze ?

Stammo murenno ormaie comme ‘e mosche

e nun s’abbosco manca p’’a jurnata.

Povera ggente ca campa sfurtunata!

‘I che destino amaro ca tenimmo

o muore nterra o muore mmiez’o mare

e simme sempe ‘e primme ‘ncopp’o munno

ca ghiammo a funno quanno ‘o munno more.

Gioacchino Ruocco

Ostia Lido           21.09.016