Si me ne vengo a pere...

Si me ne vengo a pere,

‘a quanno m’è chiammato,

ce metto ducient’anne.

Me faccio ‘e chiesielle

a una a una.

L’amice ca me passeno

pe nnanze

nun è dumamme,

sulo pe crianza,

comme stanno ?

Che s’addeventa estranee

‘a nu mumento a n’ato ?

‘E piere quanno vanno

lascia ‘e ghjì, ca ‘o cammenà

fa bbene a tutte quante!

Almeno ‘a via d’’a casa

l’è a sapè.

E tutte’e vie ca stanno

appriesso a toia ,

affianca a essa,

dint’’o lato ‘e chesta,

pe ghjì a vedè ‘o mare

ogne tanto, ‘o municipio,

’o squato, ‘o puorto,

all’acqua d’’a Maronna.

Si no che faie

si nun canusce ‘e vie ?

Ce miette ducient’anne

oltre ‘e mie.

Cchiù vvie ce stanno

e cchiù ce vonno l’anne

pe riturnà a casa.

Si tu m’aspiette

stongo a reto ‘a porta

si no tengo na voglia

ca me porta

in giro p’’a campagna,

‘o lungo mare

a ddo’ n’addore vene

ca me attirà,

na voce ca me chiamma.

Na vecchia fiamma

o na voce
‘e quann’ero piccerillo,
‘o miao ‘e nu micillo,

o ‘e  Peppe

ca me faceva ‘o sisco.

Si nun scennevo

nun saie quanta vote

c’’o faceva.

Gioacchino Ruocco

02.09.016                        Ostia Lido