Giurà su ll’uocchie tuoje....

Giurà su ll’uocchie tuoje nun è peccato.

Quale culore teneno ‘un ‘o saccio.

Tu duorme sempe e io comme a nu straccio

Me faccio d’’a matina fìno a sera

a te gurdà, ma nun me raccapizzo

pure si te stongo 'nfizzo 'nfizzo.

T’adduorme appena ll’aria se fà scura

E ‘int’’a jurnata te faje nu ripusino.

Me cirche quanno vuò nu mandarino

o nu biscotte p’asciuttarte ‘a vocca.

Ma si te faccio 'e vvote qualche avanza

te 'nviente pronta nu dulore 'e panza.

Penziece, Carmé!  Chello ca te pierde

si nun è 'o mmeglio manco 'o peggio é.

Tengo pacienza pecchè staje cu me

e tu tiene pacienza e tiene cura 'e me.

si no stesseme frisco tutt'e ddujie

si stesseme  ancora a ce da 'o vvuje.

Nun è ca 'a cosa a me me dispiace

pecchè lassannece i' truvarria cchiù pace.

Passasse pe sta via senza pentimiente

e te guardasse po' cu n'ato accento

senza penziere ca si rimasta sola

pecchè tu tiene sempe ddoje parole.

Gioacchino Ruocco

Ostia Lido                 2015/11/04