I’ quanta nustalgia …

I’ quanta nustalgia pe chesti vie…

So’ chiene ‘e luntananza, ‘e ggente sperte

‘e chiante ‘e mamma e patre rassignate

a sentì ‘a voce d’‘e figlie ormaje partute.

Qualcuno qualche vota se fa santo

e qualcun  ato resta malamente.

So’ tutte ggente ca ‘e nu modo o n’ato

cerca ‘a furtuna propria e chelle ‘e ll’ate

ca so’ rimasta a casa o se so’ perzo

comme a Pupella nu jorno dint’’o bbosco

na notte ‘e miez’abbrile  cu nu losco

ca le ggirava attuorno a tantu tiempo.

Pur’io nu juorno me ne jette ‘e casa,

ma ‘a cosa fuie tranquilla, pateme ‘o

 sapeva e, mamma pure, ma ‘a luntananza

te porta dint’’o scuro ‘e n’atu munno

fino a ca tunno tunno nun rituorno

a galla, ca piglie sciato, te siente

‘o sanghe correre int’’e vvene comme

a quann’iste dint’a na casa nova.

‘Nfaccia ll’aria se fa assaje cchiù fredda,

te guarde attuorno e ll’acqua d’’a Madonna

nun ce sta cchiù, comme ‘a ferrata

quanno se ne carette sgarrupata.

Mò ll’acqua scorre e nun se sape a ddò.

‘E figlie ‘e mamma nun ‘a vonno cchiù.

Puteche chiuse, so’ fernute affare.

Addò starranno mò chilli cumpare

ch’ereno cumpare overamente,

comme ‘o vicino ‘e case pronto sempe

a da na mano quanno ‘un c’era niente

a mettere ‘int’a panza a miezo juorno

‘o dint’’e sere vierno e na vrasera

Era ll’unica speranza ‘e qualche sera

Pe coce sott’a cennere appassuta

L’urdeme patane già ammalute.

Te puorte appriesse comme a nu tesoro

tanta penziere, e tante e lasce ‘a casa:

dint’’o suppigno o int’a nu tiraturo

ca staje siccuro nisciuno va arapì.

Si no è nu chianto ca nun va a fernì,

c’arriva fino addò te ne si ghiuto:

povero figlio ‘e mamma

vienemo a ddà ll’urdemo saluto.

Gioacchino Ruocco

Ostia Lido                  2015/11/08

Inserita nella raccolta “Ce steva na vota…”