Me sento ‘e vvote ancora piccerillo…

E’ tiempo ‘e verità si m’’a  vuò dicere.

E’ tiempo ‘e ce guardà ‘int’’a chist’uocchie

é ‘o tiempo ‘e chilli tiempe c’’a nasconnerse

i’ nun ce ‘a faccio cchiù. Che m’aggio arrenne?

‘E ccosce nun ne vonno cchiù sapé

e allora aspetto c’’o munno arriva a me.

Pure si stamma dint’’a stessa casa

vieneme a truvà c’apprezzo ‘a cosa.

Tu staje ‘int’’a na stanza e scrive sempe,

i’ vaco appriesso a chello ca me prore.

Scrivo pur’io qualcosa e me ne fotte
si ‘a votte è troppo chiena o esce ‘a fore.

Me sento ‘e vvote ancora piccerillo

ma si me mette ‘e mmane ‘int’’e capille

me rendo cunto  ca so’ rimaste poche

pure si ‘ncuollo tengo ancora ‘o ffuoco.

Che fa l’aggia stutà chistu penziero

e annaffià ‘e piante fore  ‘ncopp’a logge ?

Me metto commeto ‘e me gode  ll’aria

p’annaria pur’io qualche cumeta,

e sentì ‘o viento quanno ‘e tire ‘ncielo

e ll’aria ‘e mare che se ne porta fore

cu nu ricordo e quanno core e ccore

facevemo all’ammore tutt’e juorne.

Mò si te stongo attuorno so mumente

c’aggia piglià cu ‘e ppinze ‘o sentimento

Ca cerca vase e vo’quacc’ata cosa

e no sultante ‘e spine ‘e chesti rrose.

Gioacchino Ruocco

Ostia Lido                                 2015/10/27