Io saccio...

Tu tiene nnante a te l’eternità.

Io tengo arreto a me na vita sana

e ‘a verità ‘nn ‘a saje né tu né io.

Qualcuno dice ca sultanto Ddio

‘a po’ sapé, ma songo fatte suje.

Io saccio sulo chello ca io faccio

e tu saje sulo chello ca faie tu,

ca quanno nun me vuò tu me ne caccio,

ma io nun parlo 'e te si nun te 'ncoccio,

si nun me chiammo quano tiene 'e mpiccie.

'A ggente parla ma nun sape niente.

Nuie simmo comme 'o tiempo ancora acierbo,

comma 'a muntagna ca te leva 'o sciato.

Te guardo e me sento addubbecato,

te penzo e me ne vengo appriesso a te

cantanno na canzone ca te trove

addò tu vaje vaje, a fino 'o munno.

Pure si t'annascunno essa te trova

si vaje nfunno dint''o mare apierto

e vaje fujenno comme a nu lacierto.

Te stienno 'o sole e io comme 'a lacerta

te vengo appriesso a nu muro a n'ato

fino a c''o cielo nuvolo nun chiove

e comme a na maruzza dint''o prato

me puorte appriesso a te cchiù nnammurato.

Si 'a cielo tu me care io t'acchiappo

pe nun farte cadè dint''e rustine.

Te cellecheo comme a na riggina

comme a quann'eremo criature

c'ancora nun me so' stancato 'e tte.

Gioacchino Ruocco

Ostia Lido 2015/11/13