Addò se po’ fa notte

Addò se po’ fa notte

nun ‘o saccio.

Me porto appriesso

nu penziero sulo

‘e m’addurmi

pe nun me scetà cchiù.

Chi penza ancora

d’’a putè fa franca

nun tengo core

pe le di ca nò.

Ognuno crere

e ognuno tene ‘o crede

ca vo’ isso.

Si fosse uno sulo

chistu Cristo

nun ce ne stesso uno

a ‘ogne chiesa.

I’ che pretesa tengo !

Io appartengo

a chille ca ce credeno

ma ognuno

a modo proprio.

C’’o periscopio

ancora ‘un aggio visto

chillo ca vo bbene a Cristo

che faccia tene.

Cert’è ca ccà se more.

Nun passa n’ora

ca nun more ggente.

Chi s’aspettava

‘e campa in eterno

a st’ora

sta già ‘mbracci’ o patatreno

ca se piglia ‘o suoie.

L’inferno, ma qual’inferno ?

L’inferno nun esiste.

Simme nuie

ca nun ce mmeretammo

chistu terno

cercanno ‘e fa

sultanto ‘e fatte nuoste

senza capì a proposta.

Dio vuleva fa

n’ata esperienza,

nu fatto suie

pe piglià cusceenza

‘e chello ca sapeva

o nun sapeva fà

e ce mettette l’anne

ca ce mise

senza se cagnà

maie na cammisa.

Ce mettarrà na pezza ?

Starrà a guarda ancora ?

Pe isso n’ora

e n’eternità.

Chi sa ancora

quante n’hanna passà

primme ca s’è mbarato,

s’è dato na calmata.

Gioacchino Ruocco

25.08.016            Ostia Lido