Pariente luntane

Simme addeventate

pariente luntane.

Parlamme ‘e lana, ‘e sete,

facimme qualche affare

senza cuntarce cchiù

suspire amare o doce

ca ogne tanto ‘o core

se senteva ncuollo.

Sta vita è molla,

senza cchiù sapore

e si uno campa o more

nun ‘mporta cchiù a nisciuno.

Dint’a stu vico

ormaie è nu silenzio.

‘A gente se ne va

a poco a poco.

Na furnacella fore

a nu balcone

quanno ‘a vide cchiù !

Mò ll’aria è triste.

Se danno ‘o tu

‘e giuvene rimaste,

ma ‘o viecchi ‘e sotto

ancora te dà ‘o vuie

pure pe na crianza

‘e nu piatto ‘e pasta

ca isso po’ l’abbasta

a miezo juorno e a sera.

Chella d’’o piano ‘e coppo

esce fuienno

ca quanno stenne ‘e panne

pare ca sta chiuvenne.

Na vota ca dicesse,

na vota ca facesse…

E’ sulo pronta a chiagnere

ogne fino ‘e mese

tanto c’’a facci’ ‘a spesa

‘e vote p’essa pure

si no ‘o criature

‘o siente  sempe ‘e chiagnere.

Nuie simme addeventate

comme a pariente luntane

‘a che ce devemo a mano

‘a nu balcone ‘a n’ato.

Mò quanno parlammo

ce tenimmo astrinto

ogne penziero.

ch’’e vote parimme

cchiù estranie ‘e ll’ate

e comme a pariente luntane

manco nu piezzo ‘e pane

ce spartimmo cchiù.

Gioacchino Ruocco

24.08.016                  Ostia Lido

Inserita nella raccolta “Ce steva na vota…”