‘E femmene so’ tutte Maronne

‘E femmene so’ tutte Maronne

quanno ‘o mare aonna

e s’aizano  ‘a gonna,

quanno ‘o mare è nu lietto

e a ffianco se stenneno

e te pigliano p’’a mano

pe s’arrennere senza dispiette.

‘E femmene so’ tutte Maronne

quanno se piglieno ‘a croce

‘a cuollo a nu figlio,

quanno suffrenno

‘e pene ‘e ll’inferno

te fanno piglià nu terno

ca nun è jucato,

na bonafficiata ca nun aspettave.

E femmene so’ tutte maronne

pure quanno ‘o core s’aggrogne

e parene ‘nfame.

Te mbasteno ‘o pane,

porteno annanza na casa

e nu vaso nun manca

‘e primma matina.

‘E femmene so tutte Maronne,
pure’a mugliera ‘e ‘Nduline

ca ne supporte e supporte

ca penza ca si ‘a morte s’’a piglia,

ma po’ lascia perde pe mezzo de figlie.

‘E femmene so’ sempe Maronne.

Quanno danno a pariglia ‘o marito

ca c’’o vrito accarezza,

senza darle ‘e priezze ca esse s’aspettano

‘a quanno 'a chiurette ‘int’a casa

appena spusata,

ma ‘o facette sulo…pe nu fatto dd’’o suio.

Gioacchino Ruocco

Ostia lido           18.08.016