Si te scuorde o te fanno scurdà

Si te scuorde o te fanno scurdà

comme è triste

quanno arape na porta,

e nun truove chello ca staie a cercà.

Haie voglia ‘e fà mille penziere!

Quanno è stato ?

Aiere, l’atriere.l’atanno ?

Ma si stevo n’atanno

int’a n’ata ‘ntenzione

e steve screvenno

chella canzone

c’ogne tanto me vene,

ca me sente ‘int’’e vene,

cantà ‘int’’o core

comme è succieso ‘un saccio.

Certamente l’età !

Ogne ghiuorno s’accaccia qualcosa

o nun me reposa abbastanza,

ma cu bona crianza

nun tengo nisciuno c’avanza,

ca me penza danne penziere.

Aiere, l’atriere, l’atanno.

me l’arricordo.

‘O saccio ch’’e vote me scordo

ma ‘a rosa nun secca

cu ‘o terreno ca tene.

Tene pronte tanta bucciuole

c’’a maggio ‘o ciardino ‘mpazzisce.

Ma che pena ca tene stu core

nun trova chiù n’ora d’ammore

ca t’aggio data.

Te sento arraggiata, avveluta.

M’’a vita nun è ancora fernuta.

Stasera, cchiù tarde, dimane.

Appena t’allagio ‘int’’e mane

e nun truove nessuna ragione

pe dirmi cchiù tarde

comme ‘e vvote me faie

e me dice ca me songo scurdato,

ca te penzo, ma pò nun è overo.

Pozze dicere mille buscie

Ma cu me i’ songo sincero

ogne vote ca te vengo vicino.

Gioacchino Ruocco
Ostia Lido .. 27.08.016