Vencere…

Vencere pazzianno, nun è

comme a pazzià pe vencere.

L’affanno ca me vene

pe correrte appriesso

quanto po’ valè ?

Nu vaso o na carezza ?

Io m’arrepezzo ‘o core

‘a nu poco ‘e tiempo

E quanno ce sta ‘o viento

annario na cumeta

pe me sentì ‘inte’’e dete

‘o viento ca me tire,

‘o cielo ca me cerca

‘e vvoce dint’’a ll’aria

parreno cchiù cuiete.

Ma tu nun viene appriesso.

Cu te ce vo n’astuzia

ato c’ammore.

Cagneno ll’ore

ma tu nun cagne maie

staie sempe a fa ‘a maestra

c’ormaie nu juorno ‘e festa

è quanno nun te sento.

Io fuie ‘a ‘int’a stu vico

si no me faccio male

cu tutt’’o vrito

ca me miette annanze piede

e vvote dint’’e mmane.

Pure ‘ e palomme zompeno.

S’hanno ‘mbarato

jucanno  ‘o camapanaro.

Vanno cercanno addore

ca tu nun tiene cchiù,

chella ‘nnunceza

ca t’è levato ‘a cuollo

danno nu vasillo

a chisto e a chillo

manco si fosse mammeta

quanno t’allucca

pe nun te fa surà

e tu currive

cu nu vasillo mpomte ‘o musso

pe te fa perdunà.

Gioacchino Ruocco

Ostia Lido           21.08.016