Primma d’’a scossa …

Che stive facenno

primma d’’a scossa ?

Penzavo  a sti cosse

ca me fanno nu male

qanno ‘e notte  

pigliano friddo.

Me scummoglio

ca sott’’o lenzulo

‘un ce ‘a faccio ‘a restà.

E me giro, ‘m’avote

e ‘a capa se ‘mbroglia.

E’ mentre giravo p’’a casa

c’aggio ‘ntiso ’o rummore

ca se faceva cchiù forte.

Penzava c’’o core

se fosse schiantato.

Pure sta vota

‘n aggio avuto paura.

Ire tu c’alluccave

chiagnive, strillave.

Si curre, addò  curre ?

Sti case, ca stanno abbracciate

una cu n’ata,

carenno se sbracano e vanno

verso ‘o funno ‘e sta via

ca s’astregna

e addeventa manco nu surco.

Che Pataturco

è chisto ca manna

chest’ata arruina ?

M’è pigliata p’’a mano

invece ‘e aspettà,

ma po’ so’ stat’io

a truvà qualche scanzo

pe coppo, pe sotto

addò ‘o spazio avanza cchiù assaie.

Te guardo ‘int’a ll’uocchie

e nun saccio chi si.

Sto cercanno ‘e capì chi songh’io,

nuie chi simme

ca stammo sperenno

nu poco ‘e pietà,

na iurnata cchiù calma.

Si nun passa ’a nuttata

ca sempe cchiù ‘nfama

fa ‘e ccose annascuso,

nun riesco nemmeno a penzà.

Gioacchino Ruocco

25.08.016         Ostia Lido