Te tengo a mente...

Te tengo a mente

e m’arricorde ‘e te

quanno cagna ‘o tiempo

e dint’a ll’aria sente

ca na tempesta arriva

e io sto fore e ‘o puorto sta luntano.

Si fusse stata una malamente

che ne parlasse a fa.

Mmiez’a tanta ggente

ce ne sta sempe una comme a te

ca primma te dà ‘o core

e po’ cchiù niente.

Tu dice ca dipende sulo a me ?

Che t’aggia dì famme nu disegnino.

ca è meglio ca parlammo,

 oj ni, senza puntine,

si no tu dice janco

e io che penzo niro

me faccio janco janco.

Cu te so juto a spasso

cchiù ‘e na vota.

Si m’aspettasse ‘a te qualc’ata cosa

ce vò c’’o lungomare ‘o fanne nuovo.

‘O sentimento è na cosa seria

comme è serio si tu ce staie o no.

Si nun passasse ‘o tiempo

fosse aiere, ‘o juorno primmo

oppure putesse essere dimane

ma si meviene ancora dint’’e mmane

chello ca t’aggia dì, t’’o voglio dì.

Chello ca nu core fatto scemo

se sente ‘ncuollo e ‘un sape comme fà

pe te mannà a spasso

quanno chist’uocchie tuie me guardeno

cu miliarde ‘e nciuce pronte fatte,

mentre’io sto cercanno ‘e te dà ’o sfratto.

Gioacchino Ruocco

Ostia Lido           28.08.016