A luglio chiove sempe raramente…

A luglio chiove, sempe, raramente,

ma ‘o cielo stammatina pare ‘e vierno.

‘Mpruvvisamente  ccà s’è fatto niro

e a tirà ‘e panne dinto ‘un ce ‘a facimmo.

P’’a via ‘a ggente comme aucielle stanche

va currenno. Chi è senza ‘mbrello,

appena na speranza ‘e nu palazzo

cu nu purtone apierto, raramente.

Chi nun se chiude ‘a dinto  p’’e strapazze

‘e sti juorne  pure si ‘un tene niente ?

Tra ‘o timpo e ‘a ggente ca sta ascenno pazze

é ‘n accire accire ca nun c’è cchiù na chiazza

cuieta, nu surco ‘e via tranquilla.

Chiove! ‘E ssiente ‘e tronele ? Stu core

penza  a te, ma addò te truove ?

Fosse ‘a Maronna ca già stisse ‘a casa

c’appena trase te trovo c’’o surriso

dint’’e braccia. Nu vaso ‘a faccia

ca s’asciutta  cu a toia e cu ‘o calore

d’’o core ca te brucia ‘mpietto.

E astritto astritto a te resto attaccata

fino a ca  stu core ‘un  s’è calmato,

fino a stasera, fino a dimane

Si nun te si stancato.

Gioacchino Ruocco

Ostia Lido                    15.07.016