Pe fà pace…

Te stongo già aspettanno pe fà pace

ca so’ capace ancora ‘e vulè bbene.

Si nun tenesse core ‘un te penzasse

e me ne jesse ‘ngiro jenne a spasso.

Ma chist’ammore è nu lasso e piglia

e nun te siente parte ‘e na famiglia

e menu male ca nun tenimmo figlie

e menu male ca nun ne tiene voglia.

Te sto aspettanno, ma si cagne idea.

‘o ssaie ca so' nu tipo ca nun prea,

ca nun te voglio ubbligà cu ‘a forza

e manco ubbligà p’ammore mio.

Si me vuo bbene pure tu dimmello

guardanneme ‘int’a ll’uocchie

ca io te saccio già doppo tanta’anne

ca quanno parle dice ‘e ccose ‘e ddio.

Nun pozzo cagna strada, ‘a vita è chesta

e ‘o tiempo ca me resta sia felice

cu te o senza e te, nziem’allamice

nzieme a chi vò bbene overamente.

Me faccio ‘e cunte e nun songo niente,

niente ca và, niente ca torna, niente

comme a nu sciuscio ‘e viente doce doce

ca si aiza ‘a voce è maletiempo.

Si è tiempo ‘e mare pe me è d’’a cuntrora

fore ‘o terrazzo dint’a ll’ombra fresca.

Sta casa l’aggi’ accattata apposta.

Chi me vo’ bbene vene e s’arrefresca.

D’’o fuoco eterno ne voglio stà luntano.

‘A vita mia è pane 'nzieme cu 'o pane.

Cchiù chiara è e cchiù nun tengo ‘mpiccie

e lascio all’ate ‘e guaie cu ‘e capricce.

Gioacchino Ruocco

Ostia Lido           04.07.016