Ogni ghjuorno cchiù matta

Napule se sceta

ogni ghjuorno cchiù matta

ca si te si distratto

t’arricorda ch’esiste.

Napule a cielo apierto

è nu paraviso,

cu ‘e piere pe terra

è na gabbia ‘e matte.

All’impruvviso te truovo

annanza uno ca se crede nu chiuovo,

n’ato che vò fa ll’uovo

e nun sape ‘o verso  d’’a gallina.

E’ ‘a stammatina che vaco giranno

e veco c’‘o sole è asciuto pure

addò nun stanno panne  stise,

ma lacreme già asciutte

Si t’’e ‘mbare  a ‘nguià.

ce faje marenna ogne ghjuorne

e si t’’e lieve ‘a tuorne

nun saje comme è a fà.

A miezojuorno

c’avimmo cucinà si ll’acqua volle

e tengo ‘e mbolle ormaie sott’e piere

a ghjì giranno pe n’ombra ‘e carità ?

E io nun songo ‘o sulo

ca comme a nu mulo

stongo a scaucià,

ma nisciune pare ca me sente.

Cu ll’uocchie ‘a rete 'e lente

nun chiagnene pe me.

‘E malamente nun ‘o danno  a vedé,

si no chi ‘e crere quanno accirene ‘a ggente.

Gioacchino Ruocco

Ostia Lido           10/07/016